|
1,022 SHARES |
झापा । झापाको कनकाई नगरपालिका–९ घैलाडुब्बामा अज्ञात समूहले धानको दुईवटा कुन्यूमा आगजनी गर्दा करिब ९० मन धान र पराल जलेर नष्ट भएको छ ।
घैलाडुब्बा पशुहाटबाट उत्तरतर्फ रहेको लोक बाह्रकोटीको २५ कट्ठा जग्गामा ४८ वर्षीय महबुब आलमले लगाएको धानको कुन्यूमा गएराति आगजनी भएको हो ।
राति भएको घटनाबारे प्रहरीले आज बिहान ८ बजे मात्र जानकारी पाएको थियो । घटनास्थलमा प्रहरी टोली पुग्दा दुवैवटा कुन्यू पूर्णरूपमा जलिसकेका थिए भने आगोसमेत निभिसकेको थियो ।
आगलागीबाट धान र पराल गरी अन्दाजी १ लाख ५१ हजार रुपैयाँ बराबरको क्षति भएको प्रारम्भिक अनुमान गरिएको छ ।
धानको कुन्यूमा कसले र किन आगजनी गरेको हो भन्ने खुलेको छैन । घटनाबारे इलाका प्रहरी कार्यालय घैलाडुब्बाले आवश्यक अनुसन्धान गरिरहेको जनाएको छ ।









