अर्जुनधाराको वडास्तरीय पुरुष भलिबल प्रतियोगिताको मिति सर्‍यो, मंसिर ११ देखि हुने

अर्जुनधारा । झापाको अर्जुनधारा नगरपालिकामा कार्तिक १३ गतेदेखि सञ्चालन गर्ने तयारी गरिएको वडास्तरीय पुरुष भलिबल प्रतियोगिता मौसमी प्रतिकूलताका तथा प्राविधिक कारण स्थगित भएको छ । नगर खेलकुद विकास समितिको आयोजनामा हुने प्रतियोगिता अब आगामी मंसिर ११, १२ र १३ गते सञ्चालन गरिने भएको छ ।

नगरका ११ वटै वडाका टोली सहभागी हुने प्रतियोगिता अर्जुनधारा–६ स्थित लक्ष्मी माध्यमिक विद्यालयको खेलमैदानमा सञ्चालन गर्ने तय भएको छ । नगर खेलकुद विकास समितिको आयोजना तथा अर्जुनधारा नगरपालिका वडा नम्बर ६ को कार्यालयको सहआयोजनामा प्रतियोगिता हुन लागेको हो ।

विज्ञापन

नेपालमा भइरहेको मौसमी परिवर्तन र प्राविधिक समस्याका कारण पूर्वनिर्धारित समयमा प्रतियोगिता सञ्चालन गर्न सम्भव नभएपछि मिति परिवर्तन गरिएको आयोजकले जनाएको छ । यसअघि कार्तिक १३ देखि १५ गतेसम्म प्रतियोगिता सञ्चालन गर्ने तयारी गरिएको थियो ।

विज्ञापन

प्रतियोगितामार्फत नगरस्तरमा भलिबल खेलको विकास गर्ने, स्थानीय खेलप्रतिभाको पहिचान गर्ने तथा नगरको प्रतिनिधित्व गर्न सक्ने प्रतिस्पर्धी टोली निर्माण गर्ने लक्ष्य राखिएको नगर खेलकुद विकास समितिका अध्यक्ष सुरेन्द्र धिमालले बताएका छन् ।

प्रतियोगितामा भलिबल संघको नियमअनुसार खेल सञ्चालन गरिनेछ । प्रत्येक टोलीमा १२ जना खेलाडी रहने व्यवस्था गरिएको छ । प्रतियोगिताका खेलहरू उत्कृष्ट तीनमध्ये दुई खेल जित्ने प्रणालीमा सञ्चालन हुनेछन् भने फाइनल खेल उत्कृष्ट पाँचमध्ये तीन खेल जित्ने प्रणालीमा खेलाइनेछ ।

प्रतियोगिताको विजेता टोलीले ५१ हजार रुपैयाँ, उपविजेताले ३१ हजार रुपैयाँ र तृतीय हुने टोलीले १५ हजार रुपैयाँ पुरस्कार प्राप्त गर्नेछन् । त्यस्तै, प्रत्येक खेलका उत्कृष्ट खेलाडीलाई जनही एक हजार ५०० रुपैयाँ प्रदान गरिने आयोजकले जनाएको छ ।

व्यक्तिगत विधातर्फ सर्वोत्कृष्ट खेलाडीलाई चार हजार रुपैयाँ पुरस्कार प्रदान गरिनेछ । उत्कृष्ट स्पाइकर, सेटर, मिडल ब्लकर, उदियमान खेलाडी, प्रशिक्षक, डिफेन्डर र सर्भरलाई जनही दुई हजार ५०० रुपैयाँ पुरस्कार प्रदान गरिनेछ ।

प्रतियोगिता सञ्चालनका लागि करिब चार लाख रुपैयाँ बजेट विनियोजन गरिएको नगर खेलकुद विकास समितिका सदस्यसचिव खगेन्द्र लिङ्देनले जानकारी दिएका छन् ।

स्थानीय खेलाडीको क्षमता अभिवृद्धि, युवामा खेलकुदप्रतिको आकर्षण वृद्धि तथा नगरको प्रतिनिधित्व गर्न सक्ने सक्षम टोली निर्माण गर्ने उद्देश्यले प्रतियोगिता आयोजना गर्न लागिएको हो । मिति परिवर्तनसँगै प्रतियोगिताको तयारीलाई व्यवस्थित बनाउँदै निर्धारित नयाँ मितिमा सञ्चालन गर्ने आयोजकको लक्ष्य छ ।