यूएन मिसनको प्रश्नपत्र एसपीको घर्राबाट लिक, दुई जना पक्राउ

काठमाडौँ । संयुक्त राष्ट्रसंघ (यूएन) को शान्ति मिसनमा पठाउन नेपाल प्रहरीले लिने आन्तरिक परीक्षा (प्रि–स्याट) को प्रश्नपत्र ‘लिक’ भएको आशंकामा छानविनका क्रममा प्रहरी प्रधान कार्यालयले दुई जनालाई पक्राउ गरेको छ ।

प्रधान कार्यालय स्रोतका अनुसार प्रहरीकै साइबर ब्यूरोमा कार्यरत एक जना र युएन शाखामा कार्यरत कार्यालय सहयोगी एक जना पक्राउ परेका छन् । उनीहरुलाई नक्सालस्थित सशस्त्र प्रहरी गण नम्बर–१ मा आन्तरिक थुनामा राखिएको छ ।


युएन मिसनको परीक्षाको प्रश्नपत्र बाहिरिएको घटनाबारे छानविन भइरहेको प्रहरी प्रवक्ता एसएसपी वसन्तबहादुर कुँवरले बताए । खबरहबसँग उनले भने, ‘प्रश्नपत्र बाहिरिएको प्रसङ्ग आएपछि हामीले विशिष्ट श्रेणीका अधिकृतको नेतृत्वमा समिति गठन गरेर छानविन गरिरहेका छौँ । अहिले नै थप कुरा बताउन मिल्दैन ।’


प्रहरी प्रधान कार्यालय स्रोतका अनुसार प्रहरी महानिरीक्षक ९आइजीपीको० को सचिवालयमा कार्यरत प्रहरी नायव महानिरीक्षक (डीआईजी) वसन्त लामाको नेतृत्वमा छानविन समिति गठन भएको छ । मङ्गलबार गठित छानविन समितिमा एसएसपी, एसपी, डिएसपी र इन्सपेक्टर सदस्य छन् ।

छानविन समितिका एक अधिकारीका अनुसार यूएन शाखामा कार्यरत कार्यालय सहयोगीले प्रश्नपत्र निकालेको पाइएको छ । उनका अनुसार प्रश्नपत्र युएन शाखाका प्रहरी उपरीक्षक (एसपी) अनुपमशमशेर राणाले आफू बस्ने टेबुलको घरामा राखेर चाबी लगाएर हिडेका थिए ।

कार्यालय सहयोगीले अर्को चाबी प्रयोग गरी घर्रा खोलेर प्रश्नपत्र निकालेर एक जना प्रहरी हवल्दारलाई दिए । ती हबल्दारले त्यो प्रश्नपत्र कहाँ पुर्‍याए भन्ने विषयमा छानविन भइरहेको ती अधिकारीले बताए ।

यही साउन १५ र १६ मा प्रहरी प्रधान कार्यालय तथा सात वटा प्रदेश प्रहरी कार्यालयमा परीक्षा सञ्चालन भएको थियो । परीक्षामा जवानदेखि प्रहरी वरिष्ठ उपरीक्षक (एसएसपी) सम्मका २ हजार ४ सय परीक्षार्थी सहभागी थिए ।

प्रहरी प्रवक्ता कुँवरका अनुसार प्रश्नपत्र ‘लिक’ भएको कुरा आएपछि प्रहरी प्रधान कार्यालयले साउन १६ मा नयाँ प्रश्नपत्र तयार गरेर तोकिएको समयभन्दा डेढघण्टा ढिलो परीक्षा लिएको थियो ।

प्रतिक्रिया दिनुहोस ।
+1
0
+1
0
+1
0
+1
0
+1
0
सम्बन्धित

लोकप्रिय

लोकप्रिय