|
894 SHARES |
काठमाडौँ । अर्जेन्टिनाका कप्तान लियोनल मेसीले फिफा विश्वकपको इतिहासमा सर्वाधिक गोल गर्ने खेलाडीको कीर्तिमान आफ्नो नाममा लेखाएका छन्।
अमेरिकाको टेक्ससस्थित डलास स्टेडियममा सोमबार राति भएको समूह ‘जे’ अन्तर्गतको खेलमा अस्ट्रियाविरुद्ध गोल गर्दै ३८ वर्षीय मेसीले उक्त ऐतिहासिक उपलब्धि हासिल गरेका हुन्। आफ्नो छैटौँ विश्वकप खेलिरहेका मेसीले यस प्रतियोगितामा गोल सङ्ख्या १८ पुर्याएका छन्।
खेलको ३८औँ मिनेटमा पहिलो गोल गरेका मेसीले इन्जुरी समयको थप गरिएको समयमा अर्को गोल थप्दै पुरुष तथा महिला दुवै विश्वकपको इतिहासमा सर्वाधिक गोल गर्ने खेलाडी बने। यसअघि ब्राजिलकी महान् खेलाडी मार्ताको नाममा १७ गोलको कीर्तिमान रहेको थियो।
गत साता अल्जेरियाविरुद्ध ३–० को जितमा ह्याट्रिक गर्दै मेसीले जर्मनीका मिरोस्लाभ क्लोजको १६ गोलको कीर्तिमान बराबरी गरेका थिए। अस्ट्रियाविरुद्धको खेलमा भने उनले सुरुवाती समयमा प्राप्त पेनाल्टी अवसर सदुपयोग गर्न सकेनन्।
सन् २००६ मा पहिलो पटक विश्वकप खेलेका मेसीले अर्जेन्टिनाका लागि २०१ खेलमा १२१ गोल गरिसकेका छन्। उनी लगातार छ वटा विश्वकपमा गोल गर्ने तेस्रो खेलाडीसमेत बनेका छन्। मेसीको उत्कृष्ट प्रदर्शनले सन् १९६२ मा ब्राजिलपछि लगातार दोस्रो पटक विश्वकप उपाधि जित्ने पहिलो टोली बन्ने अर्जेन्टिनाको आशालाई थप बलियो बनाएको छ।
व्यक्तिगत चोट र पारिवारिक समस्याका बाबजुद पनि मेसी टोलीका लागि प्रेरणाको स्रोत बनेका छन्। ह्यामस्ट्रिङ समस्याका बाबजुद मैदान उत्रिएका मेसीबारे मिडफिल्डर एलेक्सिस म्याक एलिस्टारले भने, “यदि कसैले लियोबिना पनि यो टोली राम्रो छ भन्ने सोचेको थियो भने, आज फेरि स्पष्ट भयो कि लियो नै हाम्रो सबैभन्दा महत्त्वपूर्ण खेलाडी हुन्।”
हाल अमेरिकी क्लब इन्टर मियामीबाट व्यावसायिक फुटबल खेलिरहेका मेसीले उत्तर अमेरिकामा भइरहेको विश्वकप खेल्ने विषयमा अन्तिम समयसम्म निर्णय गरेका थिएनन्। यद्यपि, साविक विजेता अर्जेन्टिनाको नेतृत्व उनैले गर्नेमा सबै विश्वस्त थिए। चार वर्षअघि अर्जेन्टिनालाई विश्वकप उपाधि दिलाउन पूर्व बार्सिलोना तथा पेरिस सेन्ट-जर्मेन (पीएसजी) का यी स्टार खेलाडीले महत्वपूर्ण भूमिका खेलेका थिए।
विश्वकपका सर्वकालीन गोलकर्ताको सूचीमा मेसी १८ गोलसहित शीर्ष स्थानमा पुगेका छन्। जर्मनीका मिरोस्लाभ क्लोज १६ गोलसहित दोस्रो, ब्राजिलका रोनाल्डो १५ गोलसहित तेस्रो तथा जर्मनीका गर्ड मुलर र फ्रान्सका किलियन एम्बाप्पे समान १४ गोलसहित संयुक्त चौथो स्थानमा छन्।
अस्ट्रियामाथिको जितसँगै अर्जेन्टिनाको अर्को चरणमा पुग्ने सम्भावना थप बलियो बनेको छ।
