|
820 SHARES |
काठमाडौं । एसियन गेम्सअन्तर्गत पुरुष क्रिकेटमा नेपालले अफगानिस्तानलाई पाँच विकेटले पराजित गरेको छ। जापानको निशिनस्थित कोरोगी स्पोर्ट्स पार्कमा शुक्रबार भएको खेलमा अफगानिस्तानले दिएको १०३ रनको लक्ष्य नेपालले १७.२ ओभरमा पाँच विकेट गुमाएर पूरा गरेको हो।
नेपालको जितमा सन्दीप जोराले सर्वाधिक ३४ रन बनाए। उनले ३५ बलमा तीन चौका र एक छक्का प्रहार गरे। कप्तान रोहित पौडेल ३३ रनमा अविजित रहे भने दीपेन्द्रसिंह ऐरीले १५ रनको योगदान दिए। गुलशन झाले विजयी रन प्रहार गरे।
यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा सात विकेट गुमाउँदै १०२ रन बनाएको थियो। उसका फैसल खान र नाजिबुल्लाह जाद्रानले समान ३० रन बनाए भने नाङ्गेयालिया खारोटी १७ रनमा अविजित रहे।
अफगानिस्तानको सुरुआती ब्याटिङलाई दबाबमा राख्ने क्रममा नेपालका कुशल भुर्तेलले चार विकेट लिए। ललित राजवंशीले तीन विकेट लिएपछि अफगानिस्तान ठूलो योगफल बनाउनबाट रोकिएको थियो।
समूह ‘ए’ को यो खेलसँगै नेपालले प्रतियोगितामा विजयी सुरुआत गरेको छ। अफगानिस्तानले भने यसअघि जापानलाई पराजित गरेको थियो। अब नेपालले समूह चरणको अर्को खेलमा शनिबार आयोजक जापानसँग प्रतिस्पर्धा गर्नेछ।
२०२६ एसियन गेम्सको पुरुष क्रिकेटमा १० टोली सहभागी छन्। पहिलो चरणका दुई समूहबाट शीर्ष दुई टोली क्वाटरफाइनलमा पुग्नेछन्, जहाँ उनीहरूले भारत, पाकिस्तान, श्रीलंका र बंगलादेशसँग प्रतिस्पर्धा गर्नेछन्।
