|
3,192 SHARES |
झापा । नेपाल पत्रकार महासंघ झापा शाखाका अध्यक्ष एकराज गिरीले सामाजिक सञ्जालमा आफूविरुद्ध फैलाइएका आरोपहरू निराधार, भ्रामक र चरित्र हत्या गर्ने उद्देश्यले प्रेरित भएको दाबी गरेका छन्।
शुक्रबार सार्वजनिक वक्तव्य जारी गर्दै गिरीले आफूलाई जोडेर प्रचार गरिएका विषयमा गम्भीर ध्यानाकर्षण भएको जनाउँदै नितेश ओली नामका व्यक्तिलाई आफूले आजसम्म प्रत्यक्ष नदेखेको र कुनै व्यक्तिगत चिनजानसमेत नभएको स्पष्ट पारे।
गिरीले नेपाल पत्रकार महासंघ झापा शाखाले नितेश ओलीविरुद्ध संस्थागत रूपमा दिएको जाहेरीका विषयमा महासंघ र अन्य संस्थाले आफ्नो धारणा सार्वजनिक गरिसकेको उल्लेख गर्दै त्यसलाई आफूविरुद्ध व्यक्तिगत रूपमा प्रयोग गरी चरित्र हत्या गर्ने प्रयास भएको आरोप लगाए।
४१ लाखको चेकबारे स्पष्टीकरण
सामाजिक सञ्जालमा चर्चामा आएको ४१ लाख रुपैयाँको चेक चार वर्षअघि जग्गासम्बन्धी एक परियोजनाका लागि काटिएको बताए। उक्त कारोबार सरकारी निकायमै तमसुकसहित प्रमाणित भएको तर आर्थिक मन्दीका कारण परियोजना अघि बढ्न नसकेपछि चेक र तमसुक दुवै पक्ष तथा साक्षीहरूको उपस्थितिमा च्यातिएको उनको दाबी छ।
पुरानो विवाद उठाएर बदनाम गर्न खोजिएको आरोप
सुरेन्द्रकुमार उप्रेतीसँग सम्बन्धित विवाद इलाका प्रहरी कार्यालय र झापा जिल्ला अदालतबाट तीन वर्षअघि नै टुंगिएको विषय भएको उल्लेख गर्दै त्यसलाई पुनः उठाएर आफूविरुद्ध प्रतिशोधपूर्ण अभियान चलाइएको गिरीले बताए। यस सम्बन्धमा जिल्ला प्रशासन कार्यालयमा निवेदन दिइसकेको र आरोप प्रमाणित गर्न चुनौतीसमेत दिएका छन्।
‘कसैको रकम खाएको प्रमाण भए सार्वजनिक गर्नुस्’
गिरीले आफूले कसैको रकम नतिरेको वा आर्थिक हिनामिना गरेको प्रमाण भए सार्वजनिक गर्न आग्रह गरेका छन्। यदि आफूबाट कुनै गैरकानुनी काम भएको पुष्टि भए कानुनबमोजिम सजाय भोग्न तयार रहेको उनको भनाइ छ।
उनले नितेश ओलीलाई पनि भागेर समस्या समाधान नहुने भन्दै सम्बन्धित निकायमा उपस्थित भएर आफ्नो दाबीका प्रमाण पेस गर्न आग्रह गरेका छन्।
सामाजिक सञ्जालको दुरुपयोग बढेको गुनासो
गिरीले सामाजिक सञ्जाललाई चरित्र हत्या गर्ने माध्यमका रूपमा प्रयोग गर्ने प्रवृत्ति बढेको भन्दै यसले समाजमा भ्रम, असत्य र नकारात्मकता फैलाएको बताए। सामाजिक सञ्जालको ‘इजलास’बाट न्याय सम्भव नहुने र सत्य स्थापित हुन समय लाग्ने उनको भनाइ छ।
२८ वर्ष लामो पत्रकारिता यात्रामा आफ्नो पेशागत निष्ठा र मर्यादामा आँच आउने कुनै काम नगरेको दाबी गर्दै गिरीले आफू विधिको शासन र राज्यका निकायबाट हुने न्यायमा विश्वास गर्दै कानुनी प्रक्रियाको प्रतीक्षामा रहेको बताएका छन्। साथै उनले नागरिकलाई सत्य–तथ्य बुझेर मात्रै धारणा बनाउन र सुशासन तथा न्यायका लागि सकारात्मक दबाब सिर्जना गर्न आग्रह गरेका छन्।
