|
874 SHARES |
काठमाडौं । नेपाली राष्ट्रिय क्रिकेट टोलीले आईसीसी क्रिकेट विश्वकप लिग–२ अन्तर्गत त्रिकोणात्मक एकदिवसीय शृंखलाको पहिलो खेल आज (मंगलबार) नामिबियाविरुद्ध खेल्दै आफ्नो अभियान सुरु गर्दैछ।
नेदरल्यान्ड्समा भइरहेको शृंखलाअन्तर्गत नेपाल र नामिबियाबीचको खेल नेपाली समयअनुसार दिउँसो पौने ३ बजे सुरु हुनेछ। यस शृंखलामा नेपालले नामिबिया र घरेलु टोली नेदरल्यान्ड्ससँग दुई–दुई खेल खेल्ने तालिका छ। नेपालको दोस्रो खेल बिहीबार नेदरल्यान्ड्ससँग हुनेछ।
लिग–२ को जारी संस्करणमा नेपालले हालसम्म २८ खेल खेल्दा ११ मा जित, १५ मा हार तथा बाँकी खेलबाट अंक बाँडेको छ। नेपाल २४ अंकसहित तालिकाको पाँचौँ स्थानमा रहेको छ। समान २४ अंक भए पनि नेट रनरेटका आधारमा क्यानाडा पनि नेपालसँगै प्रतिस्पर्धामा छ।
अमेरिका ४३ अंकसहित शीर्षस्थानमा रहँदा स्कटल्याण्ड ३८ अंकसहित दोस्रो, नेदरल्यान्ड्स ३२ अंकसहित तेस्रो र ओमान ३१ अंकसहित चौथो स्थानमा छन्। नामिबिया २२ अंकसहित नेपालभन्दा दुई अंकले पछि छ भने यूएई १४ अंकसहित तालिकाको पुछारमा रहेको छ।
लिग–२ का शीर्ष चार टोलीले आईसीसी क्रिकेट विश्वकप ग्लोबल छनोट प्रतियोगितामा स्थान बनाउने भएकाले नेपालका लागि यो शृंखला अत्यन्तै महत्वपूर्ण मानिएको छ। त्यसैले विश्वकप छनोटको सम्भावना बलियो बनाउन नेपालले आजको खेलबाट विजयी सुरुआत गर्ने लक्ष्य राखेको छ।
