प्रयागराज महाकुम्भ दर्शन गर्न गएको गाडी दुर्घटना हुँदा कम्तिमा १० जनाको मृत्यु

भारत उत्तर प्रदेशको प्रयागराजमा जारी महाकुम्भ मेलाको दर्शन गर्न जाने क्रममा गएराति भएको सडक दुर्घटनामा परी १० जनाको मृत्यु भएको छ।

मध्यरातमा बोलेरो गाडी र बस एकआपसमा जुध्न पुग्दा उक्त दुर्घटना भएको हो। घटनामा परी १९ जना घाइते भएको भारतीय सञ्चारमाध्यामले जनाएका छन्।

ज्यान गुमाउने सबैजना बोलेरोमा सवार हुनेहरू रहेको जनाइएको छ। उनीहरू छतीसगढको कोरबा जिल्लाबाट महाकुम्भ स्नानका लागि आउँदै थिए।

दुर्घटना प्रयागराज-मिर्जापुर हाइवेमा भएको जनाइएको छ। घाइते भएका १९ जना बसमा सवार रहेकाहरु हुन्। उनीहरूमध्ये प्रदेशको राजगढ जिल्लामा बसोबास गर्ने तिर्थालु रहेका थिए।

उनीहरू संगम स्नानपछि वाराणासी जानेहरू रहेका थिए। टक्कर यति शक्तिसाली थियो कि बोलेरो पूर्ण रुपमा क्षतिग्रस्त बनेको छ। बोलेरोमा अड्किएका शवहरूलाई निकाल्न डेढ घन्टा लागेको जनाइएको छ।