बिर्तामोड । कोशी प्रदेशका पूर्व मुख्यमन्त्री तथा नेपाली कांग्रेस प्रदेश संसदीय दलका नेता उद्धव थापामाथि आक्रमण भएको छ। नेपाल प्रेस युनियन झापाले आयोजना गरेको वार्षिक साधारण सभाबाट फर्किने क्रममा कन्काई नगरपालिकाको जुकेखाडी क्षेत्रमा उहाँमाथि आक्रमण भएको हो।
नेता थापा सवार बा १ झ ६५३ नम्बरको गाडीमा आएको समयमा बा १ ज १८७० नम्बरको गाडीमा रहेका एक समूहले उहाँमाथि कुटपिट गरेको जनाइएको छ। कुटपिटको घटनामा नेता थापा घाइते भएका छन्। प्रहरीका अनुसार उहाँको आँखा सुन्निएको छ र थप चोटपटक लागेको हुनसक्छ।
घटनापछि घाइते थापालाई उपचारका लागि बिर्तामोडस्थित विर्ता सिटी अस्पतालमा भर्ना गरिएको छ। थापाको स्वास्थ्य अवस्था स्थिर रहेको जनाइएको भए पनि घटनाबारे विस्तृत विवरण आउन बाँकी छ।
घटनाको सम्बन्धमा अनुसन्धान भइरहेको प्रहरीको भनाइ छ। घटनाको कारण र दोषी समूहको पहिचान खुलाउने काम भइरहेको छ।
