काठमाडौं । गलत कथावस्तु प्रस्तुत गरेको भन्दै नेपाली चलचित्र ‘कार्साङ’ प्रति शेर्पा समुदायले आपत्ति जनाएको छ।
चलचित्रमा देखाइएको ‘बलि’ र ‘छेवर’आफूहरूको संस्कार र संस्कृतिभित्र नरहेको भन्दै उनीहरूले आपत्ति जनाएका छन्। अनुसन्धानकर्ता सेर्कु शेर्पाले शेर्पा जातिले बौद्ध धर्म अवलम्बन गर्ने भएको हुँदा बलि दिने र छेवर गर्ने संस्कृति-परम्परा नरहेको बताए। यस्ता चलचित्रले आगामी दिनमा साँस्कृतिक विचलन ल्याउने तर्क उनले गरे।
शेर्पा चलचित्र संघले विज्ञप्ति निकालेर चलचित्रमा शेर्पा संस्कृति र परम्पराको दुरुपयोग गरेको भन्दै सार्वजनिक रूपमा माफी माग्न माग राखेको छ। ‘शेर्पाहरू बुद्ध धर्ममा आस्था राख्ने समुदाय हो। बलि दिने प्रथा शेर्पा समुदायको हो भन्नु गलत हो’, विज्ञप्तिमा भनिएको छ।
शेर्पा समुदायको विरोध भएपछि निर्माण पक्षले ‘शेर्पा संस्कृतिमा आधारित’ भन्ने वाक्यांश चलचित्रको ब्यानरबाट हटाएको छ। चलचित्रको निर्देशक तथा लेखकसमेत रहेको याम शेर्पाले कथावस्तु समग्र शेर्पा समुदायको नभएर एउटा भूगोलको मात्रै रहेको दाबी गरेका छन्। उनका अनुसार सिन्धुपाल्चोक जिल्लाको यार्सा गाउँका शेर्पा समुदायको संस्कार-संस्कृतिमा चलचित्र निर्माण भएको हो।
शेर्पा समुदायका अगुवाले भने कालान्तरमा यो चलचित्र शेर्पा समुदायको परम्परा र संस्कृति बुझ्ने एउटा आँखीझ्यालको रूपमा स्थापित हुने भएको हुँदा यस्ता गलत कथावस्तु अहिले नै सच्याउनुपर्ने बताएका छन्।
चलचित्रका कलाकारले विभिन्न सञ्चार माध्यममा अन्तरवार्ता दिने क्रममा यो नै शेर्पा समुदायको पहिलो चलचित्र रहेको दाबी गरेकोमा अगुवाले आपत्ति जनाएका छन्। ‘शेर्पा संस्कार-संस्कृतिमा आधारित पहिलो चलचित्र खाङ्ग्री हो। पछिल्लो समय कुसुम र टिन्छेन फामा जस्ता चलचित्रसमेत निर्माण भइसकेकोले यो चलचित्र पहिलो भन्न मिल्दैन’, कुसुम चलचित्रका निर्माता फाराडेन्डी शेर्पाले भने।
गत पुस २६ गतेदेखि प्रदर्शन भइरहको चलचित्र कार्साङमा दयाहाङ राई शीर्ष भूमिकामा छन्। चलचित्रमा जितु नेपाल, सिर्जना निङ्लेखु, दिया मास्के र बुद्धि तामाङले पनि अभिनय गरेका छन्।
