बलात्कारको बदला लिन आफ्नो बुबालाई आगो लगाएर मारेको आरोपमा पाकिस्तानमा दुईजना किशोर उमेरका दिदीबहिनीलाई प्रहरीले पक्राउ गरेको सञ्चारमाध्यमहरुले बुधबार जनाएका छन्।
पञ्जाबको गुजराँवाला शहरमा यही जनवरी १ मा बाबुलाई आगो लगाएपछि उपचारका लागि उनलाई अस्पताल लगिएको थियो। उपचारकै क्रममा अस्पतालमा उनको हिजो (मङ्गलवार) उनको मृत्यु भयो।
“ती किशोरीले आफूहरूबीच बलात्कारको स्थायी समाधान गर्ने निर्णय गरेको बताए”, गुजराँवालाका वरिष्ठ प्रहरी अधिकारी रिजवान तारिकले भने, “त्यसपछि उनीहरूले मोटरसाइकलबाट पेट्रोल निकाले र सुतिरहेका बाबुमाथि पेट्रोल छर्केर आगो लगाइदिए।”
सौतेनी दिदीबहिनी रहेका उनीहरूले एक वर्षदेखि बाबुले जेठी छोरीको बलात्कार गर्दै आएको र कान्छी छोरीलाई पनि दुईपटक बलात्कार गर्न दुष्प्रयास गरेको प्रहरीसमक्ष बयान दिएका छन्।
उनीहरूका आमाहरूलाई छोरीहरुमाथि भइरहेको दुर्व्यवहारको जानकारी थियो तर छोरीहरुले आफूहरुमाथि भइरहेको अन्यायको बदला लिन बनाएको योजनाबारे थाहा पाएका थिएनन्। ती किशोरीहरुका दुवै आमा सौता रहेको र दुवैजना तिनै पुरुषसँग विवाहित हुन्।
किशोरीहरूको पहिचान गोप्य राख्न सञ्चारमाध्यमहरुले ती बाबुको परिचय पनि उल्लेख गरेको छैन। दुवै पत्नीहरूमध्ये एकजनालाई पनि पक्राउ गरिएको छ भने अर्कीसँग सोधपुछ भइरहेको प्रहरीले जनाएको छ।“अनुसन्धान सकिनासाथ केही दिनभित्रै उनीहरूलाई अदालतमा पेश गर्ने छौँ”, वरिष्ठ प्रहरी अधिकारी तारिकले भने। एजेन्सी
