बझाङमा भएको जीप दुर्घटनामा एकै घरका तीन जनासहित पाँच जनाको मृत्यु

काठमाडौं। बझाङमा छुट्टाछुट्टै जीप दुर्घटना हुँदा पाँच जनाको ज्यान गएको छ ।

बझाङको तलकोट गाउँपालिकास्थित धमेनामा राति जीप दुर्घटना हुँदा एकै घरका तीन जनासहित चार जना र मष्टा गाउँपालिका–१ कोटदेवलमा जीप दुर्घटना हुँदा एक जनाको मृत्यु भएको जिल्ला प्रहरी कार्यालय बझाङले जानकारी दिएको छ ।

दुर्घटनामा तलकोट गाउँपालिका–४ का ३६ वर्षीय बमबहादुर धामी, उनकी ७२ वर्षीया आमा जौमतीदेवी धामी र बमबहादुर धामीको ६ वर्षीया छोरी आकृति धामीको मृत्यु भएको जिल्ला प्रहरी कार्यालय बझाङले जनाएको छ ।

प्रहरीका अनुसार जीप चालक केदारस्यु गाउँपालिका–१ का ३३ वर्षीय सम्शेर मल्लको पनि घटनास्थलमै मृत्यु भएको छ। बमबहादुर धामीको छोरीको भने उद्धार गरेर थप उपचारका लागि जिल्ला अस्पताल चैनपुर लगिएकोमा उपचारको क्रममा मृत्यु भएको प्रहरीले जनाएको छ ।