बिर्तामोड । रेडस्टार क्लब झापा इलाममा जारी दोस्रो इलाम गोल्डकपको सेमिफाइनलमा प्रवेश गरेको छ ।
उपाधिको बलियो दाबेदार मानिएको मच्छिन्द्र फुटबल क्लबलाई २–१ को संघर्षपूर्ण जित निकाल्दै रेडस्टारले सेमिफाइनको यात्रा तय गरेको हो ।
रेडस्टारका आदित्य शाक्यले ३५ औँ मिनेटमा गोल गर्दा मच्छिन्द्रको लागि देवेन्द्र तामाङले ६५ औँ मिनेटमा बराबरीका लागि गोल गरेका थिए । रेडस्टारमा निराजन कार्कीले ८१ औँ मिनेटमा निर्णायक गोल गरे ।
भोलि बुधबारबाट सेमिफाइनलका खेलहरू सुरु हुनेछन् । बुधबार हुने पहिलो सेमिफाइनलमा आयोजक रेडहर्स फुटबल क्लब र चर्च ब्वाइजबीच प्रतिस्पर्धा हुनेछ ।
बिहीबार हुने अन्तिम सेमिफाइनलमा रेडस्टार क्लब झापा र न्युरोड टिम (एनआरटी) बीच प्रतिस्पर्धा हुनेछ ।
नेपाल र भारतका आठवटा फुटबल क्लबले सहभागिता जनाएको प्रतियोगिताको विजेताले १० लाख र उपविजेताले नगद ५ लाखसहित ट्रफी, मेडल र प्रमाणपत्र प्राप्त गर्नेछन् । गोल्डकपको फाइनल खेल मंसिर २९ गते हुनेछ ।
