धनुषा । प्राचीन मिथिलाको राजधानी जनकपुरमा प्रत्येक वर्ष मनाइने रामजानकी विवाह पञ्चमी महोत्सव आज रामकलेवा विधि गरेसँगै विधिवत् रूपमा सम्पन्न भएको छ।
अयोध्याबाट आएका जन्तीलाई मिथिला भोजन (रामकलेवा) तथा दक्षिणा प्रदान गरिएसँगै साताव्यापी रामजानकी विवाह महोत्सव सम्पन्न भएको हो। शुक्रबार राति रामसीताको प्रतीकात्मक रूपमा मिथिला परम्परानुसार विवाह भएको थियो।
यो अवसरमा जानकी मन्दिरलाई नवदुलहीझैँ सिँगारिएको थियो। जानकी मन्दिर प्राङ्गणमा राम, लक्ष्मण, भरत, शत्रुघ्नको प्रतिमूर्तिमा विधिवत् पूजापाठ तथा भोजन गराई जन्तीको बिदाइ गरिएको हो। रामकलेवापछि रामजानकी विवाह महोत्सव योवर्ष विधिवत् रूपमा सम्पन्न भएको जानकी मन्दिरका महन्थ रामरोशन दास वैष्णवले जानकारी दिए।
रामजानकी विवाह महोत्सवको पहिलो दिन नगरदर्शन, दोस्रो दिन फूलबारी लीला, तेस्रो दिन धनुषयज्ञ, चौथो दिन तिलकोत्सव, पाँचौँ दिन मटकोर, छैटौँ दिन रामजानकी विवाह महोत्सव तथा सातौँ दिन आज रामकलेवा भएको हो।
