कालीकोटको पलाँतामा जिप दुर्घटना हुँदा घटनास्थलमै ६ जनाको मृत्यु भएको छ। पलाता गाउँपालिका-३ राडुस्थित भित्र सडक खण्डमा बोलेरो जिप दुर्घटना हुँदा ६ जनाको मृत्यु भएको हो। मृत्यु हुनेमा पलाँता-५ निवासी छाया शाही, पदम बम, वडा नम्बर ६ निवासी दसकला शाही, भगवती रोकाया, गणेश शाही, वडा नम्बर ३ निवासी दमन रोकाया रहेका छन्।
बोलेरो जिपमा सवार १९ जनामध्ये १३ जना गम्भीर घाइते भएका छन्। घाइतेको उपचारका लागि हेलिकोप्टरमार्फत प्रदेश अस्पताल सुर्खेतमा लगिएको छ। पलाता गाउँपालिका-५ खिनदेखि सोही गाउँपालिका अन्तर्गत वडा नम्बर ९ थिर्पुतर्फ आउँदै गरेको क१ ज ५६ नम्बरको डबल क्याप बोलेरो गाडी अनियन्त्रित भई दुर्घटना भएको प्रहरी निरीक्षक तथा सूचना अधिकारी गोविन्द प्रसाद चौधरीले बताए।
गम्भीर घाइते हुनेमा कालीकोट पलाता ६ निवासी वर्ष नखुलेका केशव थापा, किशोर थापा, विजय थापा, रिदम शाही, प्रतीक्षा शाही, आशिष रोकाया, भूपेन्द्र रोकाया, वडा नम्बर ३ दान बहादुर रोकाया, निर्मला रोकाया, जगत रोकाया, चालक वतन नखुलेका धनिराम रावत यसैगरी पलाँता गाउँपालिका-५ निवासी दोलि विश्वकर्मा, आयुशा विश्वकर्मा रहेका छन्।
