उत्तरी गाजामा भएको इजरायली हवाई आक्रमणमा कम्तीमा ७३ जनाको ज्यान गएको छ। हमास नियन्त्रित स्वास्थ्य मन्त्रालयका अनुसार शनिबार राति भएको आक्रमणमा धेरै जना घाइते भएका छन् भने कोही घरमा अड्किएका छन्। इजरायलले धेरै जना मारिएको बताए पनि हमासले भने फरक दाबी गरेको छ।
इजरायली सेनाले इन्डोनेसियन अस्पतालमा बन्दुक प्रहार गरेको एक घण्टापछि सो आक्रमण भएको हो। प्यालेस्टाइनी समाचार संस्था वाफाका अनुसार यसरी भएको आक्रमणमा धेरै घरहरू समेत नास भएका छन्।
इजरायलले अक्टोबर महिनादेखि हमासका लडाकुलाई सङ्गठित हुनबाट रोक्नका लागि उत्तरी गाजामा आक्रमण तीव्र बनाएको हो। एक दिन अघि मात्र जाबालियाको शरणार्थी शिविरमा भएको आक्रमणमा ३३ जनाको ज्यान गएको थियो। शनिबार मात्र संयुक्त राष्ट्र सङ्घीय मानव अधिकार अधिकारी जोयस मसुयलो उत्तरी गाजाको अवस्था ज्यादै खराब रहेको जनाउँदै यसलाई तत्काल रोक्न आवश्यक भएको कुरामा जोड दिए।
शनिबार मात्र इजरायलले लेबनानको राजधानी बेरुतमा समेत ठुलो आक्रमण गरेको छ। इजरायलले हिजबुल्लाहले हतियार भण्डारण गरेको स्थान नास गर्नका लागि आक्रमण गरेको बताएको छ। हिजबुल्लाहको इन्टलिजेन्स हेड क्वार्टर रहेको डाहिए अहिले इजरायलको निसानामा छ। शनिबार हिजबुल्लाहले पनि उत्तरी इजरायलमा आक्रमण गरेको छ। सो आक्रमणमा एक जनाको ज्यान गएको छ।
