झापा । झापाको शिवसताक्षी नगरपालिका १० स्थित बाल निकुञ्ज माध्यमिक विद्यालयका एक शिक्षकले छात्रामाथि निर्मम कुटपिट गरेका छन्।
कक्षा ६ मा अध्ययनरत छात्रा अन्जली गुरुङलाई क्लास वर्क गर्न अटेर गरेको भन्दै नेपाली विषयका शिक्षक हेतिराज निरौलाले कुटपिट गरेका हुन् । शिक्षकले छात्रालाई पाइपले पिटेका बताइएको छ । शिक्षकको कुटपिटबाट छात्राको कम्मरमाथिको भाग डडेल्नोमा तीनवटा सुम्ला छन् । उनको बिर्तासिटी अस्पताल बिर्तामोडमा उपचार भइरहेको छ ।
छात्रालाई पिट्ने शिक्षक निरौला कानुन व्यवसायी हुन् । उनी शिक्षकहरूको छाता संगठन नेपाल शिक्षक महासंघ शिवसताक्षी नगरका सचिवसमेत हुन् । उनले आफूबाट गम्भीर त्रुटि भएको स्वीकारेका छन्। उनले आफू विद्यार्थीको उपचार भइरहेको बिर्तासिटी अस्पतालमा रहेको बताए ।
बुधबार कक्षा कोठामा नेपाली विषयको पढाइ भइरहेको थियो। विषय शिक्षक निरौलाले क्लास वर्कका लागि सबै विद्यार्थीलाई अह्राए । अन्जली त्यत्तिकै बसेकी थिइन् । शिक्षक निरौलाले अन्जलीलाई सोधे, ‘तिमी क्लास वर्क गर्दैनौ ?’ उनले शिक्षक निरौलालाई जस्ताको त्यस्तै जवाफ फर्काइन्, ‘आउँदैन सर।’ शिक्षक निरौलाले हातमा विद्यार्थी तर्साउनका लागि बोकेको पाइपको छडीले ‘ड्याम कि ड्याम’ हिर्काएको अन्य विद्यार्थीहरुले बताएका छन् । जसबाट अन्जलीको डडेल्नोमा तीनवटा सुम्ला बसेका छन्।
घाइते अन्जलीलाई विद्यालय हाताबाटै एम्बुलेन्सले उपचारका लागि अस्पताल पुर्याइएको थियो। विद्यालयका प्रधानाध्यापक भवानी थापाले शिक्षक निरौलाले गम्भीर त्रुटि गरेको स्वीकारे । उनले भने, ‘अहिले हामी विद्यार्थीसँगै अस्पतालमा छौँ । घाइतेको अवस्था सामान्य भए पनि उनी हामीसँग पनि बोलिरहेकी छैनन् । यो घटनाले विद्यालय प्रशासनलाई दुखित बनाएको छ।’ शिक्षक निरौलाको गल्तीको विषयमा विद्यालय प्रशासन र विद्यालय व्यवस्थापन समितिको छलफलपछि मात्र निर्णय गर्न सकिने उनले जानकारी दिएका छन् ।
