भक्तपुर । भक्तपुरको गठ्ठाघरमा एउटा ट्रकले स्कुटरलाई ठक्कर दिएर ज्यान लिएपछि सुरु भएको तनाव रोकिने छाँट छैन । दुर्घटनाका क्रममा रोकिरहेको स्कुटरलाई ट्रकले सोहोरेर चालकको ज्यान लिएको थियो ।
ना.६ ख २१७३ नम्बरको ट्रकले रोकिरहेको स्कुटरलाई ठक्कर दिएपछि करिब सय मिटरसम्म घिसारेको थियो । दुर्घटनापछि स्थानीयले सडक अवरुद्ध गरेका थिए । ट्रकले स्कुटरलाई ठक्कर दिएपछि सोहोरेर लाँदा स्कुटरमा सवार महिलाको शरीर क्षतविक्षत भएको छ ।
त्यसपछि आक्रोशित स्थानीय प्रदर्शनमा उत्रिएका थिए । अहिले त्यहाँ प्रहरी र सशस्त्र प्रहरीसमेत तैनाथ छन् । ट्रकमा तोडफोड गर्ने समूहले आगो लगाउन खोजेपछि प्रहरीले रोकेको थियो । त्यसपछि प्रदर्शनमा उत्रिएकाहरूले प्रहरीमाथि ढुंगा बर्साइरहेका छन् । प्रहरीले भिडलाई हटाउने कोसिस गरे पनि सकिरहेको छैन ।
त्यहाँको अवस्था तनावपूर्ण छ भने भक्तपुर-काठमाडौं सडक ठप्प भएको छ । पूर्वी नेपालबाट आउने सवारीसाधन रोकिएका छन् । त्यहाँ अहिले कयौँ किलोमिटर लामो जाम बनेको छ ।
तस्बिरहरू : नेपाल फोटो लाइब्रेरी
