बिर्तामोड । प्रदेश नं १ लाई कोशी प्रदेश नामाङ्करण गरिएपछि निरन्तर आन्दोलनमा रहेका पहिचानवादीहरुले झापामा युवा दस्ता घोषणा गरेका छन् ।
प्रदेश नं १ पुनः नामांकन संयुक्त संघर्ष समिति झापाले बिर्तामोडमा एक कार्यक्रमको आयोजना गर्दै “पहिचानकालागि युवा दस्ता” नामक १५०१ जनाको युवा दस्ता घोषणा गरेको हो ।
झापा जिल्ला स्तरीय युवा दस्ताको संयोजकमा सामी पालुङ्वा, सहसंयोजकमा सुमन सम्बाहाम्फे र कर्ण राजवंशी, सदस्य सचिवमा गौरीमान राई चयन हुनुभएको छ ।
प्रदेश नं १ पुनः नामांकन संयुक्त संघर्ष समिति झापाका अध्यक्ष पाण्डवलाल चौधरीको अध्यक्षतामा भएको कार्यक्रममा विभिन्न जातिय संगठनका नेताहरुको उपस्थितिमा बिर्तामोडको सिटी सेन्टरमा युवा दस्ता गठन भएका घोषण गरिएको थियो ।
युवा दस्ता गठनको घोषणापछि पहिचानकालागि युवा लेखीएको पोसाक लगाएर लठ्ठीसहित युवा दस्ताले बिर्तामोडको मुख्य बजार क्षेत्रमा मार्चपास गरेको थियो ।
मार्चपासमा सहभागि भएकाहरुले कोशी प्रदेश खारेजीको नारा लगाएका थिए ।
मार्चपासपछि बिर्तामोडको अधुवा खेलाको पुलनजिक कोणसभा गरिएको थियो । मार्चपासपछि आयोजित सभालाई विभिन्न जातीय संस्थाका अगुवा नेताहरुले संबोधन गर्नुभएको थियो ।
ठुलो संख्यामा पहिचानवादीहरु सडकमा निक्लिएपछि कुनै दुर्घटना हुन नदिन झापा प्रशासनले बाक्लो संख्यामा नेपाल प्रहरी र शसस्त्र प्रहरी परिचालन गरेको थियो ।
कोशी प्रदेशको चारवटा जिल्लामा पहिचानवादीहरुले यसअघिनै युवा दस्ता गठन गरिसकेको बताएका छन् ।
उनिहरुले झापामा अब पालिका स्तरमा समेत युवा दस्ता गठन गर्ने उद्घोष गरेका छन् । जस्का लागि शनिबार १५ वटै पालिकाको संयोजक समेत तोकिएको थियो ।
