श्रीलंकामा जारी एसीसी मेन्स इमर्जिङ टिम्स एसिया कप प्रतियोगितामा नेपालले पाकिस्तान ए विरुद्ध पहिले ब्याटिङ गरिरहेको छ ।
कोलम्बो क्रिकेट क्लबको मैदानमा नेपालका कप्तान रोहित कुमार पौडेलले टस जितेर ब्याटिङ रोजेका हुन् । नेपालले ब्याटिङ रोजे पछि पाकिस्तानको ए ले पहिला बलिङ गर्दैछ ।
यो समाचार तयार पार्दसम्म नेपालले पहिलो ओभरको समाप्तिमा १४ रन बनाएर उत्कृष्ट सुरुवात गरेको छ । पहलो ओभरमा नेपालले ३ चौका प्रहरसहित १४ रन बनाएको हो ।
खेलमा पाकिस्तानको ए टोली रहेतापनि टोलीमा केही चर्चित अनुहार समेत रहेका छन् ।पाकिस्तान राष्ट्रिय टोलीबाट खेलिसकेका मोहम्मद हरिसको कप्तानीमा पाकिस्तान ए टोली रहेको छ । टोलीमा राष्ट्रिय टोलीबाट खेलिसकेका मोहम्मद वासिम जुनियर तथा शाहनवाज दाहानी समेत रहेका छन् ।
नेपाल भने साविक कप्तान रोहित पौडेलको कप्तानीमा मैदान उत्रिएको छ ।
गत मेमा नेपालमा भएको एसीसी प्रिमियर कपको विजेता बन्दै नेपाल इमर्जिङ कपका लागि छानिएको हो । टेस्ट राष्ट्र पाकिस्तान स्वतः छनोट भएको हो ।
नेपालले दोस्रो खेलमा सोमबार भारत ए सँग खेल्नेछ । यस प्रतियोगितामा ६ टोली सहभागीता रहेको छ ।
