झापा । नेपाल आदिबासी जनजाती पत्रकार महासंघ (फोनिज) झापा शाखाले स्थापना गरेको डिकमान सुनुवार बिरही स्मृति बर्ष उत्कृष्ट पत्रकारिता पुरस्कार अग्रज पत्रकार भीमा शिवाकोटीलाई प्रदान गरिएको छ ।
फोनिज झापा शाखाका पूर्व अध्यक्ष गणेशमान मुखियाको संयोजकत्वमा गठन भएको पाँच सदस्यीय पुरस्कार छनौट समितिको निर्णय अनुसार यस बर्ष उक्त पुरस्कारबाट शिवाकोटीलाई पुरस्कृत गरिएको हो ।
शुक्रबार बिर्तामोडमा आयोजित फोनिज झापाको १० औं साधारण सभा तथा फोनिजको २३ औं स्थापना दिवसका अवसरमा उक्त पुरस्कार पत्रकार शिवाकोटीलाई प्रदान गरिएको हो ।
२०५९ सालदेखि कंचनजंघा एफएममा कार्यरत शिवाकोटी नेपाल पत्रकार महासंघ झापाको पूर्व उपाध्यक्ष तथा नारी सञ्चार गृह झापाकी अध्यक्ष समेत हुनुहुन्छ।
उहाँलाई नगद २५ हजारसहित ताम्रपत्र प्रदान गरेर पुरस्कृत गरिएको हो ।
त्यस्तै उदयीमान पत्रकारिता पुरस्कारबाट पत्रकारद्वय एपिवान टेलिभिजनका झापा सम्बाददाता बिष्णु श्रेष्ठ र रेडियो झापाकी कार्यक्रम प्रस्तोता गंगामाया बेघा लिम्बू पुरस्कृत हुनुभएको छ । उहाँहरूलाई जनही नगद पाँच हजार र प्रशंसा पत्र प्रदान गरिएको हो ।
पुरस्कार कार्यक्रमका प्रमुख अतिथि फोनिजका संघीय उपाध्यक्ष कमन देवान र फोनिज झापा अध्यक्ष भूमिका लिम्बुले संयुक्त रुपमा प्रदान गर्नुभएको थियो ।
